NUTURKEUN
JAMAN
·
Nuturkeun jaman nu
ditoongan ngudag mangsa nu diintipan, maca tapak nu dikoréhan, ngaji kasajatian
nu ditéangan.
Nyukcruk galur panétéan
lacak tapak panincakan lampah di unggal panyindangan. Milaku tur milampah nu
teu ngahiding ku panglarang dina kurungan adab pingitan iketan tatali paranti
kasajatian.
Pikeun ngahontal
pangalaman metikan élmu rusiah nu dikoréhan, ngarawuan hikmah nu jadi dangdanan
kamonésan. Talaga bedah geus kaliwatan, jaman sato geus karandapan, jaman édan
ngawasaan, jaman édan muru arédan keur ngamangsa jeung ngajamanan dina puncakna
kajayaan, nu ngabuah kajayaan dina karuksakan, nu ngadeg di unggal patempatan
lampah kasajatian hirup hurip urang.
Babau tingpelenghir di sakuriling
bungking kahuripan. Nutuh pikir ngaruntuhkeun pangarti nu jadi harepan kaluhuran,
ngawangun katalangkéan nu jadi aib ka diri urang. Rurujit jeung nanajis nalembrak
di sakuriling bungking kahirupan urang.
Ngarempag haté
ngaruntuhkeun pamahaman nu jadi amparan kayakinan harepan kamulyaan, ngawangun
kamurtadan nyuburkeun kakufuran, nangtungkeun berhala ngamakmurkeun kamusyrikan
diri urang. Ngiruhan kaweningan cahaya nyawa urang nu jadi wadah cahaya
sajati-Na, ngarurujit kasucian haté nu jadi tempat lalampahan kajatiana-Na,
ngotoran kabersihan darma urang nu jadi tatapakan kaluhuran, kamulyaan,
kaagungan lampah kasajatiana-Na . Babangké pasoléngkrah saincak – incak lampah
kahirupan, ngarempag adab – adaban nutuh panarat nu jadi tutunggangan lampah
harepan kaagungan.
Kahirupan geus dijarah
nafsu nu teu kawuluku, mareuman kahuripan wangunan kasajatian urang. Kajayaan
dijarah angkara nu teu kabadanan, meruhkeun nyawa ngaruntuhkeun tangtungan
jatidiri urang. Wangunan hirup nu hurip ngan kari tapakna, tangtungan jatidiri
nu jaya jeung digjaya ngan kari basana, nu aya ngan sakadar jadi buah carita
kabuyutan tatapakan kasajatian bangsa urang.
Nu kari ngan kalakay nu jadi runtah
kasajatian, pasoléngkrah di unggal kahirupan, geus dijorag ku karongkahan dina
kanistaan pangeusi jaman nu ngalaju di saban mangsa jeung jaman nu dirandapan.
Cimata seuri
gogolontoran teu kawadahan mingkin teu kaangon, cimata ceurik uprat aprét
mingkin teu kawuluku, nu garélo tambah ngajadi, nu arédan tambah rosa, nu rosa
tambah rongkah, mingkin teu kabadanan ku kaimanan nu diamparan ku pangarti
jeung pamahaman dina haté jeung pikiran nu jadi wadahna kasajatian waruga
urang.
Panarat nu jadi tatali
paranti kasajatian geus pabeulit dina cacadan, darma nu jadi adab – adaban
kasajatian geus pajeujeut dina karuksakan, kahirupan geus pakusut dina panataan
kahuripan.
Syaré’at nu ngaraga
jeung ngajiwa geus loba ngajarah hakékat nu nga-akma jeung nyukma sareng
kaayaan nu samulihna. Adab sareng tatali paranti kasajatian syaréat geus acak –
acakan dijarahan nafsu kamonésan pikiran nu jadi angkeuhan mareuman kahuripan.
Hakékat nu tacan tepung
sareng hakna pada ngajarahan, matak ngabingungkeun para musafir lampah
kasajatian. Bangsa nyawa pangeusi alam jagat raya umumna geus teu nempat dina
adab kasajatiana-Na.
Cag!
Padukuhan Pakujajar, 25
Nopember 2016
Ki H Dr Dharmasetiawan
Natapradja
© 2014 – Yayasan SKKS
No comments: